دوام بدون زحمة ..

بسم الله الرحمن الرحيم

اللهم صل على محمد وآل محمد وعجل فرجهم

اليوم وأنا رايح دوامي اللي اهو صاير في قلب عاصمة الكويت ، طلعت من بيتنا الساعة 7:15 وصلت دوامي الساعة 7:25 ، عشر دقايق بس !! معقولة مع إني من سكان محافظة مبارك الكبير

إيي عشر دقايق لأن ألحين الناس في إجازة ، المدارس والجامعات في إجازة الربيع ، طبعاً لو كنت طالع نفس الوقت أيام الدوامات جان ما وصلت دوامي إلا الساعة 8:30 !!
يعني شنو .. أنا أقولكم شنو يعني، محد مسوي لنا زحمة بالشوارع وربكة بالسير إلا طلاب المدارس والجامعات ، المدارس تبدي دواماتها الساعة 7:30 والجامعة أول محاضرة الساعة 8 ، والوزارات دواماتها تبدي الساعة 7:30 ليش كلها بوقت واحد ؟

فأكيد بتصير زحمة شوارع ، ليش ما يصير دوام الوزارات يبدي من الساعة 8:30 مثلا نفس البنوك والطلعة تكون 2:30 أو 3:00 راضين ولا نتعلق بالزحمة ساعة كاملة !!

أو الاقتراح الثاني ، يلغون المدارس ويصير التعليم الكتروني ، يعني الطلاب يقعدون من النوم ويحضرون حصتهم الأولى واهم على الفراش ، والحصة الثانية يحضرونها واهم قاعدين يتريقون ، والحصة الثالثة واهم قاعدين يشوفون التلفزيون ، والرابعة واهم يشربون شاي الضحى مع الوالدة المتقاعدة والخامسة واهم يصلون والسادسة واهم منسدحين على الفراش يريحون !!

وبجذي نكون قضينا على زحمة الشوارع والكل يطلع حق دوامه وما يحاتي يبصم على الوقت وإلا يكتب ورقة تأخير وسين وجيم ليش متأخر ..

اللي بقوله بهذا البوست يازين الدوام لما يكون يم بيتكم تطلع على الراحة وما تحاتي الزحمة وربكة السير :(