بسم الله الرحمن الرحيم
اللهم صل على محمد وآل محمد
...
يقولك مره جحا كان بالسوق مع أمه يشترون خبز وميوه (الفاكهة) المهم واهم قاعدين يمشون وجحا شايل الأغراض جان يطيح من ايده الخبز بقا يشيلها أمه قالته لا لا تشيلها لحسها الشيطان !! كملوا طريجهم شوي وإلا يطيح البرتقال منه نفس الحالة أمه قالتله خلهم لحسهم الشيطان كملوا الطريج واهم يمشون جان تطيح أمه بحفرة ، أمه قالت: ساعدي يا وليدي .... قالها جحا:آسف يمه لحسج الشيطان :) !!!!
راح يكون موضوعي هاليوم عن القصص والنوادر اللي نقراها أو نسمعها عن جحا وراح أسردها بالكلام الكويتي
بيت جحا
يقولك مره جحا قاعد يمشي مع ولده جان تمر عليهم جنازة وفي حرمه (إمرأة) تنوح وتولول على الميت وتقول: آه آه يوليدي ألحين يودونك حق بيت لا فراش فيه ولا لحاف (غطاء) ولا خبز ولا ماء !
جان ولد جحا يقول : يبا هذيله أكيد رايحين بيتنا !!
** الفقر مو عيب
.....
جحا والإعدام
حكمو مره على جحا بالإعدام فقاله القاضي: يا أبو الغصن شنو رغبتك الأخيرة قبل لا تموت ، تشتهي شي تاكله ؟
جحا: إي مشتهي آكل بطيخ
القاضي: بس ألحين مو موسم البطيخ
جحا: مو مشكلة أنا مو مستعيل أنطر لين يصير موسمه
** صج ذكي
.....
وين الغيمة؟
واحد من أصدقاء جحا مر عليه وهو قاعد يحفر في الأرض فقاله صاحبه: يا أبو الغصن ليش قاعد تحفر اشعندك ؟
جحا: أنا دفنت فلوسي بهالمكان بس ألحين ما أدري وينهم ومو محصلهم
صاحبه: جان حطيت علامة
جحا: حطيت علامة
صاحبه : وشنو كانت العلامة؟
جحا: كان في غيمة بالسما وتحتها بالضبط دفنت الفلوس بس ألحين ما أدري وين راحت الغيمة!!
** لا تعليق
---
قالو إن وزارة المواصلات كانو بيصكرون الموقع اللي محد يدشه بالكويت Youtube لسبب ما ، ويطلع لنا واحد يقول .... إغلاق الموقع واجب شرعي ووطني !!!
موقع يوتيوب فيه الزين اللي نستفيد منه وفيه الشين اللي يهين دينا ورسولنا فليش نصكره كله،،، بس إذا كان هذا منطق الجماعة فمن الواجب الشرعي والوطني لازم نسوي التالي بالكويت:
1- لازم نمنع التلفزيون لأن على الTV يحطون مسلسل شر النفوس ويحطون صلاة التراويح!
2- لازم نمنع ركوب السيارة لأن بالسيارة نقدر نشفط ونأذي العالم ونقدر نمشي نفس الأوادم ونروح المسيد!
3- لازم نمنع التلفون لأن بالتلفون نقدر نغازل بنات ونقدر نسأل شيخ عن زواج المسيار!
4- لازم نمنع الراديو لأن بالراديو نقدر نسمع المرينا FM ونقدر نسمع إذاعة القرآن الكريم!
5- لازم نمنع البلوتوث لأن بالبلوتوث نقدر نرقم بنات ونقدر ندز لطميات ... عفواً أقصد أناشيد إسلامية!
6- لازم نمنع ركوب الطيارة لأن بالطيارة نقدر نروح جزيرة بوكت ونقدر نروح العمرة!
.... وهلم مجره
بس الحمد لله الوزير الغنيم رفض إغلاق الموقع وما استعيل نفس صاحبنا المعرس !
لووووووول ،،،، فشلة
......................................................................
**معلومة: لميس بطلة مسلسل سنوات الضياع تمثل بمسلسل باب الحارة 3 !
ليست هناك تعليقات:
إرسال تعليق